平湖之友團體成員程志輝直言，從沒有想過名下「平湖之星」上季可以贏五捷咁叻仔，更大爆此馬雖然體型龐大，但內心卻很溫柔。
程志輝笑說：「『平湖仔』完全冇脾氣，我近乎每個周末都入倉探佢，而佢亦好似認得人咁，每次見到我，都會將馬頭輕輕挨埋嚟，好有靈性。」
「而我都想藉呢個機會，多謝鵬哥同容廐馬房上下手足，佢哋都好愛錫『平湖仔』，將佢照顧得妥妥當當。『平湖仔』體型龐大，比較難訓練，但鵬哥好有心機，將佢訓練得很好。」
「記得『平湖仔』嚟港初期，鵬哥已同我哋表示，咁大隻馬，對腳好容易受傷，所以千萬唔好心急，我真係很感謝鵬哥對『平湖仔』嘅悉心訓練。」
他又透露，「平湖之星」是他養過的第三匹馬，之前他曾養過團體馬「髮中寶」及「高友勁」（皆已退役）。
「除咗『平湖仔』之外，我現時都養咗另一匹團體馬『遨遊神駒』，隸屬羅富全馬房，呢匹馬上季已順利開齋， 連同『平湖之星』一口氣五捷，上季我已經六度拉頭馬，真係好難得。我覺得自己都算是幸運馬主。」
「早前我個人同女兒都中晒自購新馬籤，全部將會交由鵬哥（容天鵬）主理，而佢哋將來嘅馬名都會以『遨遊』命名，希望可以延續好運啦。」