阿仙奴上周六喺新加坡大勝巴黎聖日耳門5:1場國冠盃賽事，執法球證Nathan Chan賽前喺球員通道竟攞面黃牌出嚟問奧斯爾攞簽名，連大眼仔本人都呆一呆。但呢位首次幫阿仙奴喺今夏熱身賽上陣嘅中場冇嚇親，仲喺今場比賽先開紀錄，幫阿仙奴大勝5:1。或者呢場比賽偏向友賽性質，否則球證咁做肯定會俾人徹查。另外，開賽前另一有趣之處，係呢場比賽贊助商中國銀聯旗下銀聯國際派董事代表走入場主持擲公字儀式，但就唔係用硬幣，而係用銀聯卡（圖）。