立法會休假期間，實政圓桌田二少飛咗去加拿大探外母，仲同外母夾歌玩音樂，認真係個好女婿！田二少嘅93歲外母移民到加拿大溫哥華多年，過去卅年一直熱衷唱粵曲，仲成日同老友記一齊夾歌，田二少大讚「佢哋真係好Pro㗎」，認為係呢種熱情、呢一種香港精神，令外母Keep住一直咁健康正面。
唔知係咪睇中女婿那些年都夾過band？田二少話外母早排邀請佢一齊合唱《帝女花之香夭》，佢當然應承咗，雖然佢都話查實無論點練都好，自己都係班門弄斧㗎嘞，但應承得就要盡力做到最好，所以佢接受大挑戰前都有狂操，佢同八方講，翻睇咗好多次任白嘅演出，希望捉到個節奏、想喺演唱時啲音準繩啲，果然係「做足功課」。二少似乎都幾滿意呢次海外演出，佢仲喺自己facebook節錄咗一段同大家分享，仲留言話如果大家想睇完整版本，可以PM佢提出。