世姪V話想去佛羅里達州學網球，唔係話潑冷水，只係要照顧到現實。中國人身體，如無起碼6呎至6呎2咁高，在世界職業網壇，幾難有出頭天。費達拿身高6呎1吋，拿度亦然，梅利身高6呎3吋，祖高域治身高6呎2吋，可說為網球冠軍標準身高。張德培係最年輕之法國網球公開賽冠軍（1989），因身高5呎10吋，體形唔夠歐美選手大隻，只能在全盛時期（1989-1996）可在大滿貫賽事爭一席位，1996年9月上到全球排名第二，但之後已走下坡，職業生涯就係攞過一次大滿貫冠軍，全靠年青時有速度及擊球落點準確；但記得睇佢打溫布頓，對住啲serve and volley嘅體力型歐美對手，就往往無力抗衡。世姪V睇落到21歲都未能有6呎1吋咁高，體形又單薄少少，此乃亞洲男士之先天條件，生出來係咁，怨天怨地都無謂，中國體壇夠想發掘男性網球好手，為中國贏台維斯盃啦，山東/關外咁多高大青年，咪又係未搵到！
左丁山幻想，揸F1賽車，大隻佬高佬未必有好處，F1冠軍咸美頓仲矮過張德培少少，賽車當然講駕駛技術，但身材體能比較適合亞洲人，點解亞洲咁耐冇一位賽車好手能在F1揚威呢？唔明。或者賽車係一種好昂貴嘅運動，普通亞洲人冇資源支持，難以積累經驗以及改善駕駛技術。
亞洲運動水平無可否認係低一啲，在全球化影響下，亞洲民眾被寵壞了，經常睇到電視直播歐美高水平賽事，於是本地比賽反為冇人睇。好似亞運會咁，咁多年來舉行期間，幾時引起過興奮與高潮啫？中國壟斷亞洲金銀牌局面，日韓幾難擊破，其他國家更無力威脅中國，亞運形成中國騷，故此亞洲各地對亞運直播冇乜大興趣。香港市民頂多關心奧運，不會注意亞運，依家有線取得播映權，點都係好事，但問吓自己會唔會睇亞運直播，好似又幾難喎。怎似得世界盃足球那麼令人瘋狂！有線肯定係以低價奪得直播權，TVB邊度肯花錢去同有線爭吖，有線電視若以為咁樣可以吸收一啲新訂戶，肯定失望，反而人人都唔識奇妙免費電視係乜，用奇妙電視播亞運，點都會打開知名度嘅，體育界立法會議員Jel Ma提議政府資助轉播世界體壇盛事，一定係浪費公帑，納稅人有乜義務補貼非納稅人睇波呀？Jel Ma只係噏得出就噏啫，納稅人左丁山堅決反對。