上星期日（22號），尹太嘅孫仔擺滿月酒，身為嫲嫲嘅佢當然好開心，嗰日一早就忙唔停，先去銀行撳兩萬蚊出嚟，諗住封利是回禮畀到賀親友，然後去太子彌敦道價真棧分店買食品禮盒招呼親朋，點知邊講電話邊畀錢就失魂喇，擺低個銀包喺收銀前面唔記得攞，返轉頭銀包已經唔見咗。舖頭嘅CCTV影到一個女人懷疑順手牽羊攞咗佢個銀包，尹太報咗警，話警方追緝緊嗰個女人。
邊講電話邊畀錢出事
尹太話舖頭職員好好人，提供嗰日CCTV片段畀佢交畀警方調查，根據CCTV畫面顯示，當日朝早9點23分，佢同一個着綠色連身裙嘅長髮女人同一時間行入舖頭，着螢光粉紅T恤嘅尹太，大約兩分鐘左右就買咗一籃食品去收銀櫃台畀錢，其間佢夾住電話喺頸講，另外隻手又拎住幾袋嘢。佢喺腰包攞咗個深藍色有粉紫色扣帶嘅長形銀包出嚟畀錢，跟住佢將個銀包擺低喺收銀處前台食品上面，找錢後佢拎住幾袋嘢就走，唔記得攞番個銀包。
個銀包一直喺原位約兩分鐘都冇人發現，直至嗰個着綠色裙嘅女人走埋去，左揀右揀攞起兩三包食品之後，個銀包就唔見咗。尹太嗰朝11點幾返去舖頭搵銀包已經冇咗，第二晚佢去旺角警署報警，將舖頭條CCTV片交畀警方，佢轉述差人講CCTV有第二個角度影到嗰個可疑女人喺幾包食物度跌咗尹太個銀包出嚟，警方調查緊。
尹太開小型清潔公司，日做10幾個鐘，嗰啲係辛苦錢，佢都知自己唔小心，預咗攞唔番啲錢，但希望如果有人執到，可以畀番個銀包佢，入面仲有好多張銀行卡、證件同工作證。
爆相爆片
#MeToo個個都要爆，但係唔一定要舉牌！只要你肯爆，無論好事、壞事、憤怒事，正嘢、衰嘢、古怪嘢，影低佢，《蘋果》幫你爆，更設爆相爆片大獎賞，除咗爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。