美心集團上星期三（25號）開售流心奶黃月餅券，引起一輪炒賣，有人凌晨去門巿排隊等開門；亦有醒目嘅巿民知除咗美心，惠康都有得賣嗰款月餅券，諗住去啲冇咁旺嘅分店買，唔使排餐死啦，點知換嚟一肚氣。
李先生話月餅券正式開賣前一個禮拜，已經見荃灣大窩口邨商場間惠康戙咗個牌出嚟，話將會有月餅券發售。嗰間惠康開朝早8點，李先生25號嗰朝8點前就去到排隊，佢話只得幾個人諗住冇走雞啦，點知一開門職員話冇得賣，佢覺得奇怪再試探另一個職員口風，嗰個職員就話賣晒。
李先生唔忿氣再喺超巿門口觀察，果然畀佢見到有個師奶買到5張月餅券，佢聲稱問個師奶借啲月餅券同單據影相做證（圖），然後再問超巿職員點解有人買到，職員都係話賣晒。佢懷疑有人內部扣起啲月餅券，於是向惠康投訴，佢仲話見到好多網民有同樣遭遇。
惠康發言人話月餅券數量有限，售完即止；強調所有貨品都畀顧客選購，並確保員工確切執行。