特首林鄭月娥就叫年輕人入紀律部隊，政務司司長張建宗（圖）亦唔執輸，佢噚日發表一篇網誌，原本係呼籲市民捐血救人，點知佢都可以夾硬係篇網誌插幾句撐紀律部隊言論，將紀律部隊入面有唔少人定期捐血，小肥張可以拉到去話代表佢哋個個係嚴守紀律，八方真係服小肥張嘅擦鞋能力。
小肥張發表篇網誌題為《捐血救人 刻不容緩》，點睇佢都係講捐血，小肥張提到香港人口持續高齡化，用血需求未來會持續上升，由於出生率下降，16至25歲嘅初次捐血人數，自2011年開始下跌，由逾3.5萬人跌至去年只有約2萬人，所以小肥張呼籲年輕人加入捐血者行列，原本內容都冇乜嘢，點知小肥張特別提及，唔少恒常捐血者均來自紀律部隊，隨即整一句紀律部隊人員「不單工作時嚴守紀律，放諸捐血亦然」，八方見佢咁都可以借機擦紀律部隊鞋，真係服咗佢！