有冇人因為講過「唔係個個橙都甜」，被果欄大佬警告「傷害我們行家的信心」？而成手橙汁的講者即刻驚青回應「對引起疑慮，深感不安」？一個半個橙唔甜，會傷害整箱橙的信譽而且傷害埋果欄大佬老闆的信心？人言可畏，暗角常在，這個果欄大佬，係真要面的大佬，社團條例唔敢取締那種，你懂的！
局長今勻得罪的不是果欄大佬而係差佬，驚慄效果近磅了。由特首以至習帝加持的問責局長，閒閒地在書展齋噏，竟然被嚇到「深感不安」！這種不安之深，瞬間震懾全城。個個好市民感受到，橙，如果由差佬代言，點夠膽食！個個橙都甜，個個差佬都係好人，警棍，一定係硬嘢，收到未？任何人發出不同意見，必然「深感不安」。爛佬怕差佬的大撕裂時代中，三萬個差佬高喊×你老母，三萬個都係好人，差佬罵你杏加橙呢？百份百係愛國愛港真漢子！局長深感不安嗎？曾經勸人瞇埋眼冇眼屎乾淨盲的林鄭，認為是小事。日日都咁打得，點會柒！即刻下令淫審處，查找東野圭吾的不雅罪證！