畢明真才女也，寫完請客飲食之道，講英國人之table manner，又寫網球男神費達拿打波之優雅飄逸，大鄉里如左丁山者，方知自己乃是老粗一名，只能怨阿爺嗰代還是農民，不知禮教，難與四世三公家族後人相比。
世姪V鍾意打網球，讀書上課之外，成日掛住打網球與追看電視網球直播，當今網球四大天王之中，佢最鍾意費達拿之瀟灑，其次係拿度之粗獷雄渾，反而認為祖高域與梅利冇乜個性。左丁山叫佢細讀畢明寫費達拿。佢勉強讀完，對左丁山講：「乜寫文可以寫到咁入心入肺嘅？中文老師冇教過我地點樣寫！」左丁山大笑：「作者係畢明，唔係你嘅中文老師，睇完有乜讀書感想之類吖？」世姪V望住左丁山，慢慢細聲咁講：「我想去佛羅列達州學打網球！」
嘩，真係網球迷喎，讀直資中學果然有啲世界觀，識得有佛羅列達州網球學校。當地不同球類學校有好多，其中一間叫做IMG Academy（Bollettieri Tennis Program）訓練過阿加斯、碧加、Bjorn Borg、森柏斯四大高手，女子有威廉斯姊妹、舒拉寶娃，都幾嚇親人。但要收幾多學費，入校有乜資格呢？左丁山叫世姪V問清楚屋企是否支持先，否則得個想字，而最能說服屋企嘅方法就係在香港參加網球公開賽，如果能打入前幾名，一定係更有說服力，講說話都容易啲。但世姪V細細聲講：「我在學界比賽都未攞過獎。」咁咪係囉，左丁山當年睇世界盃電影，都幻想做17歲嘅比利，於是成日在麥花臣球場踢波，但冇天份就係冇天份，幻想始終係幻想啫，奉勸各位有大志之少年人，在要求父母支持之前，先要證明吓自己有啲料子，有奮鬥決心至得，唔好聽到父母講No之後，就埋怨家人唔支持。做精英運動員與職業運動員有時係兩回事，見到費達拿年屆37，仍然有十年3億美元贊助，唔駛羨慕，世界上有70幾億人，但只有一個係費達拿啫，自己每日打波24小時，苦練多五年都唔係另一個費達拿。
後來出街又碰到世姪E，成個人精神奕奕，行動敏捷，走路有力，唔係以前着條籃球褲行路郁屁股嗰個樣，問佢去邊度上過堂，世姪E話：「阿媽送我去暑期軍事訓練營，費用全免，由解放軍教導，學習軍人生活，所以操得狀態幾好！」佢都係相識之中，第一個參加暑期軍事訓練之人，問佢會唔會介紹細佬去參加，佢話：「細佬聽完我講在軍營大小便任人睇，到處見到米田共嘅衛生情況，話明年俾阿媽打死都唔肯去喎！」