現年44歲的新城DJ葉文輝（啤梨）去年12月和拍拖多年女友Michelle註冊結婚，昨日補擺喜酒。一對新人在尖沙嘴Hotel ICON舉行婚宴，下午他們舉行酒會儀式，以黑、金色為主題，到賀賓客有高皓正、黃翊、李美琪、龍小菌、蕭潤邦（Oscar）和陳明恩等。
鬧兄弟唔幫拖
一對新人身穿黑色禮服和晚裝裙現身，問新娘Michelle為何着黑裙？她說：「自己鍾意黑金主題，亦好鍾意條裙牌子。」啤梨表示去年同日向太太求婚，故特意揀這天擺酒。昨早接新娘，其中一個遊戲要抽卡做高難度瑜伽動作，啤梨笑言：「啲兄弟好唔夠兄弟，成日隊我出去做，好彩我骨頭未硬。」
至於愛的宣言，啤梨謂：「講咗一啲情深剖白，嚟緊賺到錢會畀晒太太，太太好感動好想喊。感謝太太將以後人生交畀我，所以我會盡自己最大力量去愛護同保護太太，畀最好嘅嘢佢。」
談到造人大計，啤梨表示好多人問他，但這段時間忙於籌備婚禮，完全沒時間。他將會向公司請假度蜜月：「因為太太最需要嘅嘢係冷氣，太太好怕熱，好難得遇到一個同自己一樣咁怕熱。」他自爆太太要他減肥，因求婚時他有排「朱古力」（腹肌），他承諾會找回其「朱古力」出來。
Oscar去取經
另外，來賓「生煎包王子」蕭潤邦今年12月23日將與江若琳（Elanne）結婚，他笑言來偷師取經，Oscar說︰「自己都籌備婚禮，見到佢哋每一part都花好多心思。Elanne成日問我會畀乜嘢驚喜佢。自己口快快同Elanne講，呢排成日見到你着婚紗嘅樣，我會唔會到時唔識感動，Elanne就落命令：『你到時見到一定要喊。』」記者笑他到時要交足戲一定要喊，Oscar表示︰「我盡量啦。」
採訪︰馬建華
攝影︰仇志德