隨住基斯坦奴朗拿度（C朗）加盟祖雲達斯，意甲嘅關注度簡直係幾何級數上升。噚日意甲賽會都公佈咗嚟緊一季嘅賽程，有C朗坐陣嘅祖記首戰將會喺8月19日，作客基爾禾。因為C朗加盟，意甲嘅品牌價值亦大大提升。同意甲保持咗多年合作關係嘅意大利電訊（TIM），本來打算喺今年合約完結後就唔再贊助。但𠵱家TIM睇中C朗嘅商業效益，決定繼續贊助意甲至2021年，每年贊助費仲高達1,500萬歐元。
而C朗過去喺西班牙一直受到逃稅官非困擾，英國《天空體育》禮拜四就報道，C朗承認相關指控，更願意繳付接近1,900萬歐元（約1.7億）嘅巨額罰款，同埋接受緩刑兩年，有關嘅認罪協議，將會喺未來幾日完成。