昨日講高盛候任行政總裁所羅門並無哈佛、MIT、耶魯學位，能在高盛芸芸名校精英中脫穎而出，爭取到成為未來CEO。原因何在呢？睇各方面報導，原因大概有兩個：一就係個人有本事，識得與人客建立良好互信長期關係，在爾虞我詐之投資銀行部門，爭取到不少併購、財務顧問及IPO公司重組等等嘅生意，呢類生意以賺取顧問費及佣金為主，全靠公司客戶網絡廣大，人面夠，人才多，即人的因素第一，不須動用公司資本資金，所賺嘅錢可直接提高公司ROE（Return On Equity），促進高盛股票價格。所羅門身為高盛投資銀行部門主管，任內將部門佔集團盈利份額由11%提升至22%，成績耀眼，自然有資格做CEO。
高盛等華爾街大行在2008金融海嘯之前，利潤相當倚賴交易部門（Trading），即代客買賣各類證券、債券、期貨賺取交易佣金及本公司之「炒房」（dealing room）之炒賣利潤。金融海嘯令交易部門大大損手，之後市場交易額成交額逐漸萎縮，監管當局嚴控大行炒賣活動，於是交易部門利潤大不如前，賺錢難好多，現任高盛CEO Blankfein係交易員出身，亦無法子唔面對現實，交棒畀投資銀行部。
所羅門冇哈佛MBA及JD學位，能平步青雲，靠的是交際手腕、溝通能力，令大小客戶受落。所以佢對公司員工公開講：「在大學時要修讀『公共演講』（public speaking）及寫作，鍾情一兩種事物，令個性有趣味！」呢樣好似人人都明白，其實唔係人人都做得到。左丁山訪問過不少本地CEO，超過一半以上唔多識講嘢，只能照住公關人員預先編好嘅Q&A讀稿，有時問佢地一條臨時加插題目，即刻舌頭打結，唔識答。其實幾乎個個CEO都讀過大學（白手興家嘅老闆反而多數口若懸河），點解接受傳媒訪問時，顯得口才甚差呢？最可能係平時講俗語俚語甚至粗口太多，一旦要稍為文雅地、自然地、有組織地公開發言，就弱點盡露。香港嘅大學好似冇public speaking呢個課程，中學生亦唔准在課堂上多嘴，所以香港學生好多怯於站起發言，內地幹部可以，企起身就誇誇其談，香港高官未見過可以咁做。大學既然冇得教，大學生不如踴躍參加Toastmasters Club活動，練習吓口才，出來打工，包有着數。慣咗沉默寡言之才子才女，在商界一定走得不遠。印度人在美國大公司當CEO嘅比例，高過華人好多，關鍵就是華人講嘢冇咁叻囉！