建造業承建商有責任保障工人工作期間嘅安全，而街上巿民嘅命仔同樣要顧及㗎！北角和富中心做緊維修工程，大廈外牆搭晒棚架同圍網，噚日下晝約兩點，一男一女行過和富道時，有支竹突然從天而降，打中泊喺路邊一架私家車車頂，砰一聲斷開兩截再反彈落地，正正跌喺男途人腳邊。
劉先生咁啱揸車經過，車尾cam影到當時嘅情況，佢話唔敢落車睇：「啱啱先飛一支落嚟，點知會唔會再有嘢飛落嚟㗎！」有途人報警，阿Sir到場調查，懷疑支竹喺和富中心15座跌落嚟，於是聯絡57歲工程負責人了解，對方解釋有做到防範措施，喺地下有劃住危險範圍位置喎，最終阿Sir冇拉任何人。
喺車cam片睇到，地面的確戙咗幾個雪糕筒，但係唔係負責人所講劃咗嘅範圍就真係唔知嘞，總之支竹飛正喺個男途人側邊，各位大哥真係要小心啲呀。