鄉議局主席劉業強「發仔」噚日帶隊視察洪水橋，先後到訪兩個露天倉庫，聽吓業界對於發展棕地有乜嘢訴求，元朗十八鄉鄉委會主席梁福元都有隨行（圖）。其中1999年起已經租用20萬平方呎存放建築鋼材嘅金源行鐵倉有限公司，公司營運經理李其信指政府將佢哋嘅土地劃入「洪水橋發展計劃」第二或第三期，但冇同業界溝通，指政府若收回棕地，好難再搵返啱用嘅土地。
元朗區議會主席沈豪傑就指，理解香港房屋短缺，但政府嘅安排同規劃確實有矛盾，所有土地都用嚟建住宅、商廈、醫院等，但查實全部同建築業掛鈎，如果冇地方放建築材料或器械，就算政府收咗土地都不能發展，要求政府優先處理安置業界嘅營運。
劉業強都話棕地唔係閒置土地，有公司營運緊回收場、加工場等，有利經濟發展，指政府唔可以漠視業界付出，唔知娥特點樣應對？