成日都話喺愛情世界，年紀差距唔係問題。近期城中熱話有48歲電視小生鄭嘉穎就嚟迎聚27歲女友陳凱琳，仲有26歲港姐何艷娟嫁66歲富商；這邊廂球壇都有忘年戀，57歲嘅阿根廷球王馬勒當拿最近求婚成功，即將同28歲嘅女友奧莉華（Rocio Oliva）拉埋天窗，兩公婆年紀相差都只不過係29年，OK吖！
據報道，其實老馬喺四年前2014年就已經同比佢後生29年嘅奧莉華訂婚，但當時乜都冇做過，連戒指都冇送，大家都冇當係正式，結婚呢件事自然都冇再理。一等四年，奧莉華隻戒指終於都出現。
相差29年 四年前訂婚
老馬最近喺布宜諾斯艾利斯同女友奧莉華搞生日派對，今次早有準備，席間喺大約45名賓客面前，拎咗隻鑽戒出嚟向佢求婚。而奧莉華隨即一聲我願意，驚天愛就再沒遺憾，呢對年齡相差29年嘅準夫婦，喺派對上開香檳慶祝，搞到奧莉華阿媽同老馬個女Jana，當時都感動到喊咗出嚟。奧莉華喺派對上講：「真係開心，終於今次係我最後一個單身生日派對，希望以後都可以同馬勒當拿一齊生活下去。」
馬勒當拿同前妻維拿芬妮喺84年結婚，到03年分手，之後一年正式離婚。到12年遇上當時二十出頭，卜卜脆嘅奧莉華。奧莉華曾經係阿根廷職業女子足球員，大家都踢波同老馬自然啱Key。佢哋兩口子早前一齊去俄羅斯睇世盃比賽，周不時喺觀眾席上情不自禁激吻（圖），有次搞到坐喺旁邊嘅「大哨」朗拿度好無奈；之但係佢哋愛情路亦唔係一帆風順，早前曾傳出過奧莉華被老馬毆打嘅消息。暫時仲未知佢哋嘅婚禮會喺幾時舉行，但阿根廷報章就話，將會分別喺阿根廷同意大利搞。
