火炭豐景花園室外泳池成為馬騮嘅後樂園，《蘋果》去睇過，嗰度係依山而建，屋苑對開山邊叢林都有馬騮出現，漁護署仲喺近山頂位置嘅叢林放咗大捕猴籠，但籠入面生晒雜草，又唔見有餌，街坊都話唔覺個籠有捉到馬騮。
不過，豐景居民似乎習慣同馬騮一齊生活，好似趙先生就覺得馬騮問題唔算嚴重，佢都見過有馬騮仔跳落屋苑泳池，認為污染咗池水，管理公司應該要先換水，暫時唔好畀住客落水。
另一住客盧小姐亦都話，上年已聽過屋企人講，喺屋苑泳池見過馬騮，但佢自己就冇親眼見過，亦都唔肯定管理公司有冇封泳池消毒。喺度住咗好多年嘅陳先生同小記講，冇聽過屋苑有馬騮爬入屋，亦都理解啲馬騮通山走，好難話杜絕佢哋走入屋苑嘅。