明星效應無錯係好好嘅宣傳攻勢，但如果未經同意就拎人哋個名做生招牌，隨時惹禍！八方聽聞，公民黨新東立法會議員、黨魁楊岳橋就中咗招，有地區人士懷疑未經佢同意，就喺海報上印住「楊岳橋議員辦事處」幾粒字，因為管理公司去信楊辦，先至東窗事發。而呢件事廣傳後，陸續有民主派包括黃之鋒同邵家臻受害人現身，引發咗一場民主派嘅#Me Too風雲。
將軍澳團體冒AY議辦印海報
八方聽聞，最近出事地點係喺有唔少民主派友好傘兵出沒嘅將軍澳，捲入風波嘅則係將軍澳民生關注組嘅葉嘉榮，本來佢同公民黨喺地區上你有你做我有我做，互不相干，但據知楊辦早前突然收到某公屋管理公司嘅信件，先至知道葉嘉榮申請張貼嘅海報，印有佢議辦嘅個名；若非管理公司以為屬楊辦而通知，海報可能過關而出咗街咯。
八方問過葉嘉榮，佢話係溝通上嘅誤會，涉及技術問題，又質疑楊辦若覺得有問題，可以報警，並稱自己其實同楊岳橋傾緊合作喎！同屬將軍澳民生關注組嘅陳展浚主動同八方解釋，指事件涉及技術兼溝通問題，反覆重申海報最後冇出街，葉嘉榮已主動撤回張貼嘞。楊辦回覆八方查詢時證實，最近發現有人懷疑盜用佢哋辦事處名義，喺未經同意下向個別大廈管理公司申請宣傳位置。楊辦強調挪用他人名義以使用公共資源乃非法行為，保留追究權利。
咪以為只有楊岳橋只係受害人，事件傳出後，社福界立法會議員邵家臻主動同八方講佢都身受其害，指去年7月發現陳展浚冒認佢向將軍澳怡明邨管理公司申請橫額，佢當時唔識陳，對於有人用佢名義申請橫額不明所以，形容情況「可怕」。當時陳係謝正楓區議員辦事處職員，邵即時向謝投訴。家臻話之前都想息事寧人，點知陳一而做出冒認行為，絕對唔可以姑息養奸，所以挺身指證。眾志黃之鋒亦喺fb引用八方報道，發帖指6年前陳展浚已經攞住個籌款箱冒認學民籌款，「今時今日都係用同一招冒認其他組織單位」。
李八方