現年25歲嘅韓國知名模特兒崔素拉，身高達179cm但卻非常瘦，之前更曾經透露自己嘅減肥方法，當時佢為咗時裝周，試過一個月唔食飯，只係靠飲水度日，最終因為冇攝取熱量令成個人冇乜力氣，甚至差啲暈低，最終靠少食、多運動去Keep fit。
早前忙於時裝周嘅崔素拉於Instagram上載自己暴飲暴食嘅相，一臉幸福嘅表情，佢又留言：「飲食帶畀模特兒嘅影響」，自爆自己達成人生最低體重46KG(101.2磅)後，終於獲得慰勞，繼而邊食烤肉邊爆喊，令粉絲又心痛又好笑，有粉絲留言擔心佢突然暴飲暴食會導致胃變差，同時又指佢太過瘦，希望佢多多注意身體。