國際足協周二公佈2018年度最佳男女子球員同教練嘅候選名單，最佳男子球員方面，兩大球星基斯坦奴朗拿度（C朗）同美斯都上榜，但除咗佢哋之外，喺今屆世盃表現出色嘅法國新星基利安麥巴比同樣有份入圍，睇怕今年都未必再係C朗同美斯兩個玩晒啩？
尼馬傷咗半年落選
自從國際足協同金球獎「分家」之後，前身係世界足球先生嘅FIFA年度最佳男子球員呢個獎近兩年都係由C朗奪得，呢位葡萄牙球星上季就協助皇家馬德里創下歐聯三連霸嘅偉業，所以今年都肯定係得獎大熱。C朗喺今屆世盃表現都非常唔錯，一共射入四球，可惜葡萄牙輸畀烏拉圭16強止步。
C朗嘅多年對手美斯今屆雖然都有入圍，但佢帶領嘅阿根廷喺今屆世盃就唔突出，加上巴塞喺上季歐聯都係普普通通，所以今年都未必係C朗力爭三度獲將嘅最大威脅，反而喺世盃踢得好好嘅麥巴比、克羅地亞中場莫迪歷同埋今年贏咗歐霸盃加世界盃嘅法國前鋒基沙文，都有機會打破C朗同美斯近10年嘅壟斷。
除咗上述幾位得獎熱門之外，英格蘭射手哈利卡尼、比利時孖寶夏薩特、奇雲迪布尼同埋上季喺利物浦踢到曉飛嘅穆罕默德沙拿都有份候選，不過今年養傷咗半年先復出嘅巴西前鋒尼馬就冇份喇。
C朗同美斯今年有冇份攞獎就未知，但無論結果如何，相信都唔會咁容易動搖到佢哋兩個喺球壇嘅地位。
C朗ig一貼袋600萬
據英國《每日郵報》報道，C朗就擊敗咗美斯同尼馬等球星，成為體壇最有價值嘅「網絡紅人」喇。報道指，C朗每一個ig貼文單係喺廣告收入方面已經有57萬鎊（約590萬港元）落袋，而第二位嘅尼馬就有45萬鎊、美斯就以38萬鎊排第三；而掛靴多年嘅「萬人迷」碧咸就以23萬鎊排第四。
至於美斯自從世盃後，關於佢嘅話題都係圍繞佢會唔會退出阿根廷國家隊，阿根廷足總主席泰比亞日前接受訪問就透露，最近同美斯見過面，不過就冇傾過佢嘅前途問題，泰比亞話美斯都好愛阿根廷，所以唔信佢會退隊。