今年五月同Daniella Semaan結婚嘅車路士球星法比加斯，周二喺西班牙伊比薩島補辦慶祝派對，球壇眾星包括美斯、亨利、泰利、蘇亞雷斯等都攜眷出席，法比仔唔少前巴塞隆拿及阿仙奴隊友以及現役車仔隊友均有到賀，場面星光熠熠。
車路士周一喺澳洲踢完季前熱身賽以1:0小勝珀斯光輝後，喺周二上午已返抵倫敦，英國傳媒報道，車仔領隊沙利原本打算取消上任主帥干地安排嘅假期，但得悉陣中不少球員獲邀出席法比仔周二晚喺伊比薩島舉行嘅結婚派對後，決定回心轉意，等球員返到訓練基地進行放鬆訓練後可以趕去伊比薩島，周三嘅一課輕鬆操練改為非強制性參加，到周四至恢復正式訓練，因此法比仔嘅車仔隊友就可以參與個派對嘞。