舊年維港渡海泳勞工及福利局局長羅致光（圖）同會計界立法會議員梁繼昌、環境保護署副署長區偉光、環境局政助區詠芷一齊游，結果佢半個鐘就游完全程，事後佢對第一次落場有咁嘅成績好滿意，今年維港渡海泳又嚟，羅致光會再參加，仲係政府入面搵咗新拍檔一齊游。
香港業餘游泳總會主辦嘅「新世界維港泳2018」今年10月21日喺維多利亞港舉行。由於歷屆報名情況越嚟越踴躍，大會今年將比賽名額增加600個至3,600個，希望更多市民參加，截止報名日期係8月9日，而早喺6月12日，大會已開始接受網上報名。娥班子今次反應唔錯，除咗羅致光同區詠芷會再度下海參賽，商務及經濟發展局局長政治助理馮海容亦率先報名，齊齊暢泳。
大會今年仲特別贊助兒童心臟基金會、聖雅各福群會、西貢區社區中心、香港遊樂場協會、香港精英運動員協會等非牟利組織，派員參與今屆維港泳，實行與眾同樂。