這個星期，唔黐紅線，唔正常。「山神」掠港後U-turn打回頭，造成一股歪風，四旋亂港，目測所見，明顯算係熱帶氣旋的社團，天文台卻唔敢用社團條例取締任何一個風。遭李氏力場打回原形的打工仔，與一號波離奇再遇，可惜無額外風假，勁無mood，想賴床剪膠睇晒淫審處「紅牌趕出書展」的村上春樹新書上下冊，略嫌唔夠時間。有心人也許可以物理些，試吓發掘兼上載N種陰莖包膠方法，印證淫審不雅條例work定唔work。噢，避孕套品牌中最有創意的杜蕾斯，可以大剌剌玩嘢了，推出不雅特區別注版，免費向中港司機派發。淫審處沒有柒出國際咁叻，但間接令物流從業員了解到，除咗「龍虎豹」，「刺殺騎士團長」同樣「被淫褻」，咁即是有料到，唔係流！而每個響應忽然扮唔呃人的689，上大灣區做戰狼墊底的香港市民，必然自攜一本春樹包膠上去，擺正係習帝神像下架那個位置，念念不忘，深深反省，等待住淫審處宣告升級，要向全港十八歲以下人士包膠，包實後生仔雙眼，咁就睇唔到書中的陰莖與奶油互動，性器再也不能在男主角與女伴之間「口述」……