特首林鄭月娥上任後好努力催谷港人國民身份認同，佢自己仲封埋國家主席習近平做偶像，去年仲安排遼寧號訪港，就係要令港人一睹國家軍備風采，不過民建聯近日就市民對國情同八一建軍節睇法做民調，個結果顯示政府嘅推銷方式，似乎對年輕人冇乜效。
民調由民記做，結果大概估到。電話訪問713人，73%人贊成增加接觸解放軍嘅機會，60%人贊成港人可自願加入解放軍。不過如果睇埋不同年齡階層取態，個結果就好有趣。喺12至39歲組別入面，得五成二贊成要知多啲解放軍，竟然有近四成人唔贊成，而40歲以上就有86%人贊成；至於係咪開放港人自願參軍，青年組正反意見都係4成幾，40歲以上就有67%。
如果咁睇，40歲以下人士有幾認同中國，怕且唔難估到。民記立會議員張國鈞話，世代差異乃平常事，但政府有責任為年輕人提供機會接觸內地，希望進一步畀解放軍走入社區喎，不過呢類宣傳對可以喺互聯網乜都睇到嘅新一代，真係有用咩？