港鐵已經成日做宣傳提醒乘客唔好衝門，但都係有乘客為咗爭分奪秒而冒險！前日下晝5點幾，有位媽媽同個讀小學嘅小朋友可能一時心急，喺將軍澳綫寶琳站衝上車，點知小朋友上唔切車，媽媽想拉佢入車廂嘅時候，車門已經閂埋，媽媽右手四隻手指俾車門夾住，而小朋友仲企咗喺月台。
當時喺列車上面嘅汪小姐話，列車開咗兩、三秒，車長突然廣播叫乘客緊握扶手，隨即急煞咗兩下，乘客都覺得好奇怪，然後就見到有個阿Sir喺車尾跑去車頭位置，汪小姐好奇之下跟住去睇吓乜事啦，去到近車頭位置，就見到嗰個媽媽手指俾道門夾住，原來係有乘客掹咗緊急掣，所以車長要緊急煞車。
車長透過列車上面嘅對講機同乘客對話，乘客叫車長開門，但車長就解釋架車開行咗就開唔到門，一定要駛返月台先得。車長仲問番乘客想去寶琳站定係坑口站，由於當時啱啱開車，列車仲未完全駛離寶琳站，乘客梗係話去返寶琳站近啲啦，而且俾門夾手嘅媽媽，仲好擔心留咗喺寶琳站月台嘅小朋友。
乘客鬧港鐵應變慢
前後擾攘咗25分鐘，最終車長決定倒車返去回寶琳站月台，嗰位媽媽嘅手指終於鬆脫，即刻走出月台接番個小朋友，汪小姐形容嗰位媽媽緊張個小朋友多過自己隻手痛唔痛。在場有乘客批評港鐵啲緊急應變機制差勁，汪小姐就理解車長嘅解釋，況且衝車門真係唔啱，但就覺得港鐵嘅應變慢咗少少，同埋車長十五十六，仲問番乘客想點，呢樣就好奇怪囉。
港鐵發言人話，當時列車準備駛離月台，車長發現有乘客拉動緊急通話器手掣，於是通知車務控制中心，獲授權將列車倒後退回月台。俾車門夾手指嘅女乘客冇受傷，搭番嗰班車離開。