早排商務及經濟發展局局長邱騰華見咗幾大商會之後拉晒警號，話如果中美貿易戰開打，對香港貿易影響好大，所以會嚴陣以待，不過噚日財政司司長陳茂波就氣定神閒得多，話要睇埋美國會唔會真係落實、到時點徵關稅，先評估到對香港嘅影響。佢兩個對中美貿易戰態度似乎好唔同，咁究竟邊個睇法啱啲呢？
波波噚日去完書展講貿易戰，話留意到市場對美國考慮對中國2,000億美元入口貨徵關稅感憂心，但佢就派定心丸，話第一波已落實嘅500億美元開徵關稅貨品，其實對香港今年影響好細，之後要睇美國會點做、會唔會真係落實，先可以進一步評估對香港出年有幾直接嘅影響，強調政府有措施支援中小企，香港金融體系又穩健，大家要提高警惕，但不需過慮。
商界人士話兩個都有道理
波波叫人不用過慮，但邱騰華又話要嚴陣以待，咁究竟邊個睇法啱呢？有商界人士話關鍵係由邊個角度睇。波波話短期冇事、香港金融體系穩健係啱，但邱騰華講嘅係一旦開打，呢個唔只係加稅問題咁簡單。呢個商界人士話好多廠家擔心，一旦買家因為貿易戰走咗，就算日後貿易戰平息，都可能唔再返轉頭，咁對香港中小企會造成永久性打擊，隨時捱唔住要執笠，咁就真係要嚴陣以待！佢仲講笑話，其實好多愛國愛港廠家最擔心唔係港府冇應對策略，而係怕特首林鄭月娥為顯示緊跟中央，失驚無神就貿易戰發言向美國挑機，萬一激嬲美國打埋香港就慘！
李八方