早排運輸署喺尖沙嘴推出行人導向標示試驗系統，用指示牌同標示板向市民提供步行資訊，當時好多人發現個指示牌同標示板設計好正，好似倫敦用緊嘅指示牌，甚至有人估係運輸署搵同一個設計師設計，點知呢個「英倫風」嘅標示板，原來唔係山寨版，而係真正有英國血統，仲係由英國倫敦交通局同運輸署合作設計。
英國倫敦交通局（Transport for London）星期一喺facebook發文，介紹尖沙嘴呢個行人導向標示系統，證實由佢哋同運輸署合作參與設計，鼓勵市民多啲喺城市步行。好多網民大讚今次引入「英倫風」設計好過「中國風」多多聲，有網民仲話好有親切感。