愛協為絕育貓狗剪耳作記認鬧出風波，小記翻查資料，其實外國獸醫係有另一種做法，同樣有相同功效，又唔會傷害到小動物。
好似美國同澳洲，狗狗絕育後，獸醫會喺狗狗耳仔紋上特別標記（例如有直線貫穿的圓形），即使其他地區選擇用剪耳標記法，一般亦只會為已絕育貓狗輕微剪去耳角以作識別，而唔係好似香港愛協咁，剪去三分之一隻耳朵。
獸醫黎昌生就認為，即使剪去貓狗三分之一隻耳仔，只要傷口護理得宜，都唔會對貓狗健康造成不良影響。佢個人認為，對絕育貓狗用剪耳作為標記好過紋身，因為貓狗會長大，毛髮亦會生長，而耳仔或其他身體部位嘅紋身圖案，可能會隨着時間變淡或被遮蓋。
黎昌生強調，若誤會已絕育流浪貓狗未絕育，而再派人去捕捉佢哋，喺捕捉嘅過程可能對貓狗造成危險及傷害，所以喺遠處就可以睇到嘅絕育剪耳標記，係有可取嘅地方。