2018年中美貿易戰幾時展開嘅呢？追番上去啲日子，特朗普在3月22日簽署備忘錄，啟動1974年貿易法第301條，指示美國貿易代表向1000億美元中國進口貨徵收關稅，中國立即宣佈報復，之後雙方有磋商，到中國副總理劉鶴5月與美商談判，好像有轉機，中美雙方發表聯合聲明尋求和解。
香港股市在1月26日創新高，達33154點，當時人人樂觀，認為股市可以扶搖直上，點知大市隨即回跌，2月9日跌至29507點，十個交易日間，恒指跌咗11%，但跟住低位反彈，至3月20日，恒指爬上31549點，呢個時候傳出貿易戰消息，股市應聲下滑，3月22日收市報31071點，從此走勢反覆，一浪低於一浪，7月19日收市報28010點，創全年新低，比1月26日足足跌咗15%，咁跌法，當然係受到4月16日美國正式公佈對華進口貨徵收關稅清單，7月10日又再向額外2000億美元徵收10%關稅所致。
總括而言之，由貿易戰而起至7月19日，香港股市跌個不停，中國A股曾跌破2700點，直至7月20日下午中國國家隊出手救A股，香港股市先至回穩，反彈至28224點收市。相反地，美國股市自1月26日杜瓊斯指數創下歷史新高26616點之後，到7月20日收市報25058點，只係向下調整咗6%，比較之下，顯然美國股市唔多怕貿易戰。
貿易戰展開之後，人民幣幣值一路下跌，至7月20日跌破6.8（兌美元），如果央行唔出手，跌破7都唔奇，點解咁跌法，一般以為係中國趁美元強勢（加息，經濟增長好），讓人民幣下跌，以抵銷新關稅壓力，特朗普唔會喜歡人民幣下跌嘅，但當所有新興國家貨幣都下跌，人民幣趁勢跌，特朗普點鬧得出口，於是唯有向聯儲局打開口牌：「我唔喜歡加息」。聯儲局素來獨立性強，特朗普委任嘅主席鮑威爾是否會向特朗普跪低，有待觀察。
7月20日午飯後行街，在中環街市附近見到財富管理銀行家T（以前稱之為私人銀行家），問佢生意如何，佢話生意幾好，每次去上海江蘇行一趟，都有大戶幫襯，咁啲大陸富戶幫襯，買甚麼產品呢？財富T話：「買美股囉，我照我行分析師意見，背得唸唸有辭，指出貿易戰展開，人民幣貶值機會大，不如買美元，用美元買美股，放棄A股，內地啲富戶都唔知幾聽話！」左丁山笑佢：「你因住成為教唆走資罪人。」財富T話：「邊度係呢，大陸人都唔知幾鍾意揸美金，根本唔使我煽動！」