曼聯領隊摩連奴認為，保羅普巴喺俄羅斯世界盃精采嘅演出，係呢名法國國腳喺替紅魔比賽時，根本未有盡全力比賽嘅最佳證明。
摩佬話：「呢個唔關乎我哋有冇發揮佢最好嘅一面，而係佢有冇喺比賽中盡力發揮出自己最高同最好嘅水平，我認為世盃係讓佢呢類球員有所發揮嘅最好平台。點解我咁講？因為世盃只有一個月，普巴喺世盃只能夠想關於足球嘅事，佢喺訓練營同隊友一齊，完全同外面嘅世界隔絕，佢哋只能夠諗住足球。」
呢名葡萄牙籍主帥繼續話：「喺球季期間，會有唔少唔相關、相對冇咁重要嘅賽事，你可能會因為咁失去咗焦點同集中力。但世盃唔同，世盃每場比賽都好重要，從分組賽到16強、八強、四強同決賽，場場都要好集中，呢樣會令球員喺比賽中更有動力，所以對普巴嚟講，係完美嘅環境。」
普巴𠵱家就喺洛杉磯，同部份法國隊友及紅魔隊友連格、費蘭尼等享受假期，而佢兩個國家隊隊友班捷文文迪同奧士文尼迪比利就去咗邁阿密，同「細哨」朗拿甸奴、拳王美韋達一齊喺夜店開派對，非常盡興。
