財政司司長陳茂波噚日朝早現身灣仔會展，同青年逛書展期間，一度主動搵青協一本烹飪書，當被青年問到平日有無煮嘢食時，佢笑言：「啲人就話阿茂整餅喎！」自爆早前佢個女整過帶子沙律畀佢食，佢至今仍記得好好味。問到若要煮一味餸畀家人食，佢會整乜時，陳茂波就話會整潮州芋泥，話呢味係家鄉嘢，要用好多心機先整到。
陳茂波會上又推介兩本書，包括探討成功人士為何與眾不同的《異數：超凡與平凡的界線在哪裡？》，話相信創業年輕朋友睇完會有啟發。另一本就係《宋詞故事》，陳茂波自爆細個時讀中文中學，喺老師影響下特別鍾意睇詩詞，𠵱家想輕鬆吓或者發吓夢時，就會攞呢啲書嚟睇。
有青年席間又問陳茂波人生有乜遺憾，佢就話係媽媽過身比較早，佢出嚟做嘢幾年就過咗身，享福時間比較少，對佢嚟講係一個遺憾，呼籲年輕人創業搏殺時，要不忘抽時間陪阿媽食飯同飲吓茶喎。