今年書展個個官員都落場大搞親民show，要同年輕人「connect」，噚日就到警務處處長盧偉聰喇！唔好以為一哥落書展係想呼籲新一代「加入警隊實踐抱負」喎，查實佢係落嚟教大家阿Sir做嘢到底係點做。佢先嚟就介紹《The Thinker's Toolkit》呢本書，話入面有14個方法，影響到佢平日做嘢同落決定時應該點做。一哥話啊，做決定時會有好多資訊喺你面前，你要做嘅就係搵到個好處最多、壞處最少嘅Solution，仲話呢個世上無完美嘅Solution㖭！
話跟傅瑩學演講技巧
佢又話自己做得呢個高位，有時真係「高處不勝寒」，仲話自己面對困難時唔會退縮勇敢面對，嘗試解決問題癥結，需要良好嘅溝通技巧！咁一哥學演講同溝通技巧係跟邊個學？就係中國前外交部副部長傅瑩喇！佢話透過傅瑩本《我為中國演講》可以喺佢身上學到出色嘅演講技巧，幫到佢向市民解釋警方點解要咁做時，講得好啲咁話喎。
一哥識拎傅瑩本書推薦畀年輕人，果然知乜叫政治正確！唔怪得之後佢俾記者問取締民族黨單嘢，佢企硬警方見到任何組織同社團涉違法行為，絕對有責任搜集證據，如果證據充份就有責任執法，完全政治正確。