「政治一日都嫌長」，德國嘅土耳其裔中場奧斯爾因為五月同土耳其總理埃爾多安嘅合照，引發國內傳媒對佢批評，有球迷甚至喺世盃期間作種族歧視言論，就算德國總理默克爾有幫佢辯護，但係呢位29歲嘅五屆德國足球先生，周日發表長文宣佈退出國家隊。
92次代表德國射入23球嘅奧斯爾，係德國贏得上屆世盃冠軍嘅功臣，但佢喺五月同到訪倫敦嘅埃爾多安合照，俾國內傳媒話佢幫競選緊連任嘅獨裁者站台，話佢背叛德國民主價值兼擾亂軍心咁，就算默克爾當日話：「我相信球員冇考慮過埃爾多安嘅選舉問題同帶來嘅影響，我好肯定佢哋忠於德國隊。」都冇用，最後奧斯爾繼續為德國效力，不過世盃分組賽出局後，佢到周日出千字文解畫，指與埃爾多安會面純粹是對自己血統嘅尊重。
贏波係德國人 輸波係移民
奧斯爾嘅聲明話：「經深思熟慮後，我決定唔再代表德國，足總同好多人嘅說話，令我感到不受歡迎，我由09年以來嘅功績都被遺忘。我曾經以穿上德國球衣而自豪同興奮，但𠵱家德國嘅種族主義令我冇咗呢種感覺。」而且，奧斯爾提到純種德國人馬圖斯，世盃期間去到克里姆林宮同另一個不受西方歡迎嘅領袖普京握手，但不被批評係雙重標準：「我哋贏波時，我就係德國人，我哋輸波後，我就係移民。」奧斯爾更指波蘭裔嘅前隊友普多斯基同高路斯，從未被球迷稱為「德籍波蘭人」，更加令奧斯爾覺得自己嘅穆斯林教徒身份被標籤。
俾球迷爆粗罵「土耳其豬」
球迷方面，德國喺世盃擊敗瑞典後，有球迷用粗口辱罵奧斯爾，話佢係「土耳其豬」。更加感慨嘅係，奧斯爾呢個移民身份以前好受德國人嘅愛戴，拎過好多獎項，15年做埋德國足球大使，而奧斯爾呢個土耳其移民第三代，從來冇掩飾過家鄉情懷，曾經講過「我嘅技術同球感，係屬於土耳其人嘅特色，紀律、態度同着重整體戰嘅意識，就係德國人嘅部份」，不過當年默克爾民望高企，話要將德國建設為多元文化、種族嘅國家，𠵱家今時唔同往日，拜仁主席漢尼斯仲狙擊奧斯爾，話佢係德國輸波罪人。
球員知名度高，被騎劫唔出奇，埃及球星穆罕默德沙拿世盃前就曾經同車臣領袖卡德羅夫見面，結果俾人權組織抨擊，傳出沙拿一度想退隊。
