旺角人多車多是常識吧！讀者蕭小姐上星期六（21號）喺油麻地上海街佐敦道見到「地頭蟲大戰紅Van司機」。蕭小姐話當日傍晚6點幾，有架紅Van俾私家車阻住上落客，於是響按超過分半鐘，冇幾耐私家車上3個男乘客忍唔住落車，圍住紅Van車頭爆粗鬧司機，仲話「上海街係我睇」，司機嚇到鎖上車門車窗。
出聲鬧都唔止，其中一個人竟然拆埋紅Van水撥丟向司機。蕭小姐話自己當時都有啲驚，但圍觀嘅十零個伯伯就冇有怕，不停起哄叫「打佢啦」，不過3個惡漢似乎已卸咗道火，返上車走人，成個過程不足1分鐘。而小巴司機一直都冇落過車，事後自行報警。
警方證實嗰日曾接獲一名51歲男小巴司機向警方備案，指因泊車問題與三名男子爭執，懷疑有人拍打其小巴但未造成損毀，事件列「糾紛」。蕭小姐就覺得：「兩個都唔啱，可能天氣熱躁咗啲。」