係人都知北京呢期最關心嘅香港議題，就係粵港澳大灣區規劃幾時出台！之前仲傳中央成立大灣區領導小組，特首林鄭月娥會做副組長！咁熱門、又受中央重視、又有商機項目，又點會少前特首梁振英一份，搶閘亮相攞甜頭？佢噚日仲先行接受傳媒訪問，大講大灣區三大發展建議，唔知以為佢做咗大灣區特首！
指內地市場拯救港青免失業
梁振英接受《星島日報》訪問，主動提及大灣區三大發展建議，包括日後香港私家車唔使申請中港牌就可經港珠澳大橋返內地、外國公民持香港永久居民身份證可以免申請簽證進入大灣區，以及在某啲大灣區需要嘅行業，港人若喺該處做嘢只需繳納香港稅率，又話如果冇內地呢個市場，大批港青會失業喎！
梁振英仲喺訪問中話，離任特首後每日都到位於堅道嘅前特首辦返工，強調工作時間同以前一樣，只係唔使再作回應式工作！嗱，娥特對大灣區都好上心㗎，早前仲獲主管港澳事務嘅副總理韓正召見傾大灣區，林鄭喺7.1當日上午同傳媒茶敍，仲「爆料」話韓正喺會面45分鐘期間，全程都係聽佢講述意見，似乎都想凸顯佢呢位「現任」特區對大灣區嘅睇法。不過有個咁積極搶住講大灣區嘅前任喺度，而且梁振英仲要係政協副主席，假假地係國家領導，唔知娥特有冇咩特別感受呢？
李八方