特首林鄭月娥開口埋口都對國家主席習近平極之崇拜，落鞋油絕不手軟，但八方估唔到娥特咁快學識內地為官之道，對習近平夫人彭麗媛一樣服侍周到，堂堂特首做彭麗媛嘅信差亦撈埋，仲要連送信嘅對象係幼稚園學生，娥特一樣在所不計！
話說舊年7月習主席同佢夫人彭麗媛訪港期間，主席夫人就曾經到訪過九龍塘嘅又一村學校參觀。學校嘅幾位幼稚園學生今年就寫咗封信畀主席夫人，仲送上親筆畫作，但就想唔到得到習夫人親自回信。
難忘天真可愛笑臉
上次少年警訊寫信畀習主席，就由中聯辦主任王志民代做信差，今次係習夫人回信，竟然出動到娥特做信差，專登出封邀請信請3位收信嘅學生同佢哋家人到訪禮賓府，好似「領旨」咁領返封信。
根據政府新聞處嘅新聞稿所講，娥特仲要好似「宣旨」咁款，響個聚會之中，宣讀習夫人回信內容同大家分享㖭。政府新聞處仲非常識做，將習夫人嘅回信內容大公開，內容大致都係閒話家常，話小朋友天真可愛嘅笑臉實在令佢難忘，鼓勵同學仔大個之後，要用智慧同雙手「描繪人生最美的畫卷，書寫香港更加美好的明天」，仲轉達對又一村學校老師同小朋友嘅問候。娥特響新聞稿仲特別提到，習夫人訪港期間，百忙之中都抽空去幼稚園探訪，睇學生表演、同佢哋玩遊戲同送禮物畀佢哋；𠵱家仲親自回信學生，真係充份表達咗習夫人對香港學生嘅愛護咁話，不過八方諗，班小朋友咁細個，怕且轉頭已唔多記得娥特讀咗乜！