前排ViuTV搞咗個節目《Good Night Show全民造星》，喺99位男參賽者當中選出一名男神，佢可以得到演出機會同100萬獎金。ViuTV近日喺fb專頁搞咗個「《全民造星》eye catching idol選舉」，等網民將心心獻畀5位心水參賽者，而得到最多心心嗰5位就直接入50強。
自稱多朋友
不過，近日就爆出55號參賽者何駿廷（Ting Ho）被質疑買票。事緣現年24歲、報稱係音樂人嘅Ting Ho有1,500個心心，但畀心心嘅網民超過九成都係外籍人士，搞到連93號彭嘉桓（Moley）都留言問Ting Ho係唔係畀人陷害，亦有網民留言寸爆Ting Ho：「如果呢度衰咗，你去東南亞嗰度都會受歡迎，你好多東南亞粉絲。」
Ting Ho喺本周播出嘅《全民造星》否認造假：「我係絕對唔會做呢啲事。之前我喺英國讀書，我真係有好多喺英國讀書時識嘅外籍朋友。」Ting Ho噚日以短訊回覆查詢再次解釋：「其實fb投我票嘅外國人，有部份係我喺英國時認識，所以我未必識得晒每一個投我票嘅人。」據悉，Ting Ho最終未能直入50強，而且已被淘汰。
撰文：馮仁昭
