做得區議員，要同街坊熟稔絕對唔容易。上月以高票勝出東區佳曉選區補選，成為新紮區議員嘅前鍾樹根助理、民建聯植潔鈴(Elaine)就唔單止被街坊記得，直頭被「點全相」。皆因佢出生時居於柴灣臨屋區，同唔少街坊齊齊等到90年先上樓搬入小西灣邨，「（臨屋區）入面有廁所，但地方好細...細個就喺屋企門口沖涼，附近鄰居小朋友，因為阿爸阿媽返工，都會一齊沖涼」，佢笑住話細細個已經同街坊「肉帛相見」，早前競選時仲有街坊專程上前話當年睇住佢沖涼，認真睇住佢成長。
做得區議員，幾乎24小時全天候服務，一班街坊街里事無大小都會搵區議員幫忙，Elaine都話「從未得到咁多人嘅attention（關注）」。三姐妹排行第二的Elaine笑言，自細所得到的關注總係最少，訴求總係不被重視，「阿媽會話要聽家姐話，或者要讓細妹」，自爆為咗爭取「表現」，特意喺讀書方面着手，「小學時多數考全級頭十名，家姐細妹無咁好，原來會被人讚㗎喎，啊媽話點解次次考試去唔到五名內嘅？咁我下次就考到喇。佢之後又話點解考唔到第三名嘅，我又考返嚟囉！」
經常笑容滿面嘅Elaine畀人感覺較斯文，但佢話自己都有啲脾氣，細個玩串珠首飾，細妹自己有一套，但又吼住佢條串珠手鏈，但媽媽就話做家姐要讓細妹，「因為佢細個啊嘛，我覺得唔係理由，好唔忿氣，所以一嘢扯爛條鏈，啲珠周圍彈，個畫面好深印象」。到咗今日，佢話同管理公司職員等人士爭取居民福利時，都會擺出「poker face」，嚴詞表達訴求，唔少人都話原來佢係隻「辣椒仔」。
由出生、成長到工作都喺小西灣，Elaine自言離唔開此區；即使中學到過澳洲交流，城市大學讀英文系時又去過新加坡實習，但佢最終都揀咗喺小西灣打拼。一當選又要應付明年區會改選，佢話暑假休會後連快閃旅行都冇時間，事關仲未請到助理幫忙分擔工作，唯有喺一啲自己舉辦而又有興趣嘅活動中，參與當放假。放假都冇時間，相信約30歲單身嘅佢，暫時都冇乜時間拍拖咯。