藝人撞衫撞鞋就見得多，估唔到今次係撞...喼，就嚟做老竇嘅陳柏宇（Jason），昨日喺Ig晒新喼相，同佢撞喼嗰位藝人，咁啱都係有喜事發生，就係9月升呢做人妻嘅卓韻芝，估唔到佢哋品味咁相似，都係睇啱Samsonite嘅EVOA喼。
快為人父嘅Jason，上個禮拜五踏入35歲，佢仲喺Ig晒大肚老婆符曉薇（Leanne）親手整嘅「麒麟臂」蛋糕相，寫道：「個蛋糕係瘦猛猛親手整架。」第一次懷孕嘅Leanne腹大便便，之前更自嘲似「豬西」，相信小公主出世後，兩公婆有排都冇得去旅行！
《蘋果》聯絡Jason，問係咪諗住囡囡出世前，帶老婆去旅行做獎勵呀？佢以短訊回覆：「嚟緊呢三個月，Leanne都唔可以去任何地方旅行，我諗要等到寶寶7、8個月，先可以用呢個新喼啦，依家惟有假裝為將來旅行做足準備，哈哈！」原來Jason苦中作樂，佢嘅聲帶爆血管，唔可以講嘢，只有幻想去旅行開心吓。
至於9月15日下嫁「閃電俠」梁子賢嘅卓韻芝，唔知係咪入定新喼去度蜜月呢？見佢喺Ig仲晒埋私家行李牌「G」，留言：「超正我已訂自家名字G喼」，仲介紹埋品牌喺7月27日-8月5日，喺又一城搞Pop up store㖭。
