1994年以2.8億買入深水灣一間豪宅嘅李兆峰，近日返來香港，宣傳美國投資移民。記者小G係地產專家，但1994年時仲未中學畢業，根本唔知李兆峰係邊個，但對地產價格就熟到不得了，佢話：「深水灣豪宅大屋現在睇怕要二三十億元一間，呢位李先生賣得太快噃。」鬼唔知，但李兆峰之兆峰陶瓷在2001年清盤，個人破產令要到2005年先至全部解除，當年2.8億元買入，破香港樓價紀錄，只能留在記憶中。
一位老記者當年35歲，當李兆峰買屋時，發現李兆峰亦係35歲，有家財35億，自己就數埋件衫都冇35萬，感觸到幾乎想投筆從商，到中環下海。好彩冇啫，後來李兆峰生意失敗，被中環股市離棄，而老記者則平穩過活，至今未算係富翁，但亦足以退休無憂，講心境，可能比李兆峰更舒暢，一個人最怕少年得志，老年失意，潦倒餘生呀！
不過李兆峰艱苦奮鬥，來一個鯉魚翻身，雖無復舊日風光，已經令佢有足夠信心，返來香港見老友及傳媒。呢日佢與左丁山相見，佢對左丁山講：「好彩發達得早，破產得早，等我有時間從錯誤學習，卒之憑舊業務（陶瓷、智能馬桶）翻身，再可以在美國地產搵到啲，今年六十歲咯，乜嘢未見過？幾多人有發達──破產──再起身嘅經驗呀？」
左丁山自大學畢業至今，生活如一條直線，太過平靜，冇資格同佢講逆流，於是問佢何以選中德克薩斯州侯斯頓做地產？鍾意睇火箭隊打籃球乎？非也，李兆峰話：「侯斯頓地產發展不設地積比（Plot Ratio），係全世界獨一無二嘅，買幅十萬呎地，我起五十萬呎固然得，起到一百五十萬呎亦冇政府干預，總之係夠膽起幾大就可以起幾大，全靠市場觸覺及估計需求夠準確，咁就有得博啦！侯斯頓本來係一個石油城市，但醫療業已逐漸追上，好可能成為第一大產業㖭，啲醫院與特別專科治療中心嘅面積大到無倫，設備儀器全世界最新，全世界有錢人都想去侯斯頓做手術。」呢樣嘢左丁山就知噃，香港一啲先進有銀分子咪會去侯斯頓做心臟手術囉，侯斯頓之所以美國名醫滙集，全靠當地政府通過全美國最寬鬆嘅醫生法例，令病人控告醫生專業失職比較困難，醫生有較大保障，唔似得在加州可以被告到破產咁，於是醫療業大盛！
李兆峰話侯斯頓天氣好，地方大，經濟有前景，故此美國內地移民不斷湧入，到侯斯頓買地產作投資移民（最少五十萬美元）有得諗咁講．但若非專業人士，移民幾乎等於失業，此則要衡量清楚。