時事評論員「夫子」劉銳紹近年轉寫香港少有嘅時評文學，成績相當唔錯，去年就有兩本著作獲獎。夫子今年則喺次文化堂推出新小說《天才飛與棺材淚》，靈感源起去年李飛以全國人大基本法委員會主任身份來港講解《基本法》時，特區政府罕有「鼓勵」學校直播一事。
夫子話，特區政府去年配合李飛訪港，推動硬性「洗腦」後，佢走訪過唔少教育界人士同年輕人，發現唔少教育界人士都用醒目抗爭方式「反洗腦」，佢喺書中分享咗唔少有趣觀察，亦希望對現時香港前景感到灰暗嘅香港人打打氣。
1973年已開始做記者嘅夫子又話，佢腦中一直儲存唔少採訪時嘅有趣觀察，現時都會融入喺小說之中，希望未來專注於寫作經得起時間考驗嘅時評文學。其實夫子喺今次新作之中，年輕學生主角個名叫做「周之聰」，唔知一眾精靈讀者，知唔知呢個主角靈感嚟自邊幾位學生領袖？