隔牆有耳：
華人民主書院晚宴　
鄭宇碩被嘲眼眉跳 - 李八方

華人民主書院噚晚慶祝成立7周年兼舉行籌款晚會，唔少民主派人士，包括佔中發起人戴耀廷、工黨主席郭永健、前銅鑼灣書店店長林榮基等都畀面出席。最近先後被馮檢基同一名前助理攻擊嘅華人民主書院董事鄭宇碩，晚會上成為書院校長「阿陶」陶君行同書院董事「仁哥」何俊仁拎嚟開玩笑對象，仁哥笑鄭教授呢期好紅，應該成日都眼眉跳。

鄭教授聽到就苦笑話，自己只求心境平靜，自爆最近都冇睇啲親建制報章同前助理老屈佢本書，心情即時舒服番唔少。阿陶就搞笑話，唔少人喺前日民陣遊行，見到鄭宇碩個樣唔太開心，呼籲台下賓客要「撐吓教授先」，即時台下一陣掌聲。

拍賣「打破柏林圍牆」版畫

鄭教授話香港民族黨面臨被取締後，佢都擔心華人民主書院過幾年成為非法組織，第日聚埋一齊食飯或搞籌款都可能犯法，呼籲大家晚會上要把握機會嘞！
籌款晚會上除咗拍賣靚紅酒，亦有方蘇以「打破柏林圍牆」同「防火牆與異見者」為題嘅版畫，以及公民黨創黨黨魁余若薇以《自由花》歌詞同冰心家訓為題的書法作品。