黃子華，我愛你！
坐我前排有女觀眾肉緊地小聲說。唔係嘛，對黃子華講我愛你，點可以細細聲，一定要一個區一個區咁大聲叫，玩人浪咁，由綠區一直逆時針殺過去將黃子華的愛纏綿地繞紅館360度N圈！係，阻住地球轉都要盡地一煲！不過講「我愛黃子華」，觀眾席無人夠陸離資深長情。民間特首發哥跟子華識於90年微時，陸離早在黃大仙城市當代舞蹈團發現演出第一波棟篤笑的黃子華，時為1987的黃金時代！
陸離驚為天人的子華終於升呢成棟篤神，才情跨世代，走到今天連開26場，陸離神心，以睇三場休息三場而且請晒朋友同好一齊睇的超級後援姿態，高調繼續撐子華。陸離愛子華，無人能望其項背。我們愛子華，卻真的愛得不夠，因為不夠，才會有今日的金盆𠺘口。這個金盆決定封盤，令人神傷。黃子華是我們的維港，維港從此九點半熄燈，你話會點？早唞？上床睇不雅的村上春樹嗎？我向樂觀預計子華會再棟篤的石琪提議，不如請黃子華上市！黃子華上市，全港子粉一人兩手，長揸黃子華！每年的股東棟篤大會在紅館開，邊個夠佢威，唔係咩！