今季組軍積極嘅利物浦展開為期八日嘅美國之旅，佢哋上禮拜六已經到咗當地，準備參加國冠盃賽事。一班紅軍球員當日就到咗美國全國運動汽車競賽協會（NASCAR）位於夏洛特嘅車廠，一齊睇驗車房仔嘅工作，沙迪奧文尼、穆罕默德沙拿、拿比基達等喺工作人員嘅指導下，戴上護目鏡幫啲車換胎。喺大軍名單入面嘅新兵梳頓沙基利暫時未見人，原來佢身處紐約，過幾日就會喺新澤西州同大隊會合。
另外，曼聯喺16年以8,930萬鎊嘅天價收購保羅普巴嗰時，紅軍領隊高路普就諷刺對方玩金錢足球，仲好強調咁話︰「如果我有呢筆錢，會有其他更好嘅使法」。但𠵱家紅軍羅致世界最貴門將艾利臣比加同埋最貴後衞華基爾雲迪積克，高路普即刻轉口風︰「當年講錯嘢，𠵱家已經改變諗法」。