脊髓肌肉萎縮症（SMA）係一種非常罕見嘅遺傳病。患者輕則身體機能持續退化，要長年用輪椅同呼吸機，重則仲會因病死亡，以前無藥可醫，好彩2016年年底，有美國藥廠發明咗隻醫SMA嘅新藥，SMA病人周佩珊就用4個月打咗份過百頁嘅計劃書畀政府，獲特首林鄭月娥親自去信藥廠，終與藥廠達成協議，3月宣佈引入新藥，病人可獲關愛基金資助。
首批SMA病人今年已經打咗針，病情仲有好轉㖭，例如7歲嘅Marcus終於有力自己拎起匙羹食飯，連呼吸機都用少咗，仲揮動無力嘅小手問媽咪：「你睇吓呢啲係咪miracle（奇蹟）？」至於佩珊，雖然佢因為脊椎問題未用得藥住，醫生正研究喺佢脊椎開出洞口，注射新藥。不過佢見到其他病人唔使再受病魔折磨，都話好開心呀！
今年亦係SMA病人基金會FSMA成立廿周年，出版咗新書《愛生命 活無限》。娥特喺佢哋新書發佈會上面拍晒心口，話政府引進新藥「錢唔係問題」，仲會出盡力幫埋其他罕見病病人，希望佢講得出做得到啦。