「日頭唔好講人」這種民間智慧，命中率之高早就毋庸置疑，一講曹操曹操就到，唔聲唔聲嚇你一驚，但勢估不到「日頭唔好講物」都好靈，剛剛昨天上午才在專欄透露基吧過門不入，深夜便親身闖進其中一間會友──逼於無奈啊，嗰個鐘數的上環，除了酒吧和麥記，落腳點接近零，橫又係掂又係，不如一箭雙雕，順便探吓行情。打開門立即目瞪口呆：不是說自從同志識人apps盛行後，基吧日漸式微嗎，怎麼星期六晚十二點未到，已經仔仔一堂水洩不通，柳下惠就算無意索油，都必須短兵相接，不停和前後左右發生身體磨擦？稍定神才發覺，原來聰慧的兄弟姊妹心靈手巧，舊場景結合新科技，昔日在酒吧打躉守株待兔的狩獵方式確實過時了，吧不是不蒲，但橋段推陳出新，把酒之際不忘𥄫實手機個芒，方圓十尺之內的芳草資料一覽無遺，埋嚟睇埋嚟揀，睇啱拋電子媚眼，對方豎起尾巴先至眾裏尋他，面懵碰灰機會大幅度降低，效率果然不可同日而語。
講到先進的搵仔探射燈，連網上理財也束手無策的半電子盲，當然愛莫能助，要我自動斬頭貼張力擠乳溝肉照招徠其他無頭東宮，更是難上加難，呢種太子生唔生都罷，不過為了與時代接軌，久不久上去望望增廣見聞，遇到特別具教育意義的，會截低以作座右銘。譬如呢位自稱「吃夠了人間煙火」的神仙哥哥，呼籲下列人士唔該行開，包括「玩家、食家、假照、宅毒、菸酒毒迷、生活唔掂、健康出錯、經濟差、有卡數、口腔發臭、衛生欠佳、政治鬥士和寵物狂熱」，我不禁驚呼：妙玉，乜又係你啊？