賊人爆格唔成功，除咗道大門夠硬淨之餘，家居天眼亦屢建其功，業主陳小姐話單位一直租畀人住，其後租客遷出，佢同老公就將單位一開二，裝修翻新後分租畀2名租客，由於旺角區始終係品流複雜嘅地方，唐樓又無大閘，任何人可以自出自入，雖然個單位四十幾年都無竊賊光顧，基於安全考慮，佢哋就喺淘寶用1,500元買咗個高清天眼，再搵裝修師傅安裝喺門口，今次就係靠佢拍低成個犯案過程，交畀警方憑相緝兇。
有售賣監控鏡頭嘅店舖職員同我哋講，近年多咗人選擇喺門口裝天眼加強防盜，價錢由數百元到過千元不等，視乎鏡頭質素而定，豐儉由人，部份天眼可透過WiFi連上手機實時監控，最重要係賊人望到個鏡頭，都要考慮吓係咪繼續犯案，有一定阻嚇作用，是家居防盜好幫手。