世界盃就完咗個幾星期，不過尼馬不斷誇張倒地翻滾嘅畫面，就肯定仲留喺球迷心目中，而放緊假嘅尼馬，上星期六就喺佢旗下品牌舉行嘅五人足球賽開腔，話佢俾人踢一樣會傷會痛，所以避重就輕係無可厚非，睇吓大家接唔接受佢解畫啦。
俾人踢反而被批評
巴西喺世盃八強輸俾比利時1:2出局，只係留低尼馬不斷翻滾嘅片段，呢位26歲嘅巴黎聖日耳門（PSG）球星就話，自己有睇網民嘅惡搞圖同片，但就唔會嬲，只會用幽默感一笑置之，不過佢就話對佢嘅批評唔公道：「去批評被侵犯嘅人，竟然會快過批評犯規嘅球員。我去世界盃係為咗比賽，唔係去俾人踢。呢類話我做戲嘅批評係誇大咗，不過我都慣晒。」佢亦話自己唔會改變風格：「我踢波係鍾意靠盤球正面挑戰對手，我唔會企定問人可唔可以借借，因為我要入波，好多時我挑戰嘅對手，都係慢過同重過我，當佢哋攔截我時，我梗係唔想被踢中，咁好易會受傷，但其實每場波之後，我都要敷四至五個鐘冰，對腳先冇咁痛。」
獲老友丹尼爾力撐
尼馬連埋囝囝喺巴西現身，其實係為咗自己旗下品牌搞嘅全世界最大型年度五人足球賽。佢嘅PSG兼巴西隊友丹尼爾，今屆雖然因傷踢唔到世盃，不過佢都現身力撐老友尼馬嘅活動，仲幫佢講好說話：「我有睇嗰啲惡搞，但其實尼馬俾對手侵犯，一啲都唔好笑，不過同樣嘅指控不斷重複，更加令人覺得批評者愚蠢，所以尼馬唔需要理會呢啲評論。」
講番個五人賽，原來成個賽事踢足成年，最後嘅混合隊同女子隊贏家，會得到挑戰尼馬嘅機會，最後尼馬嗰隊喺夾咗兩個PSG女子隊同巴塞隆拿女子隊球員下，贏咗混合隊冠軍墨西哥5:2，不過輸俾巴西女子隊1:2，而佢預計一兩個星期後就會返PSG開操。
