以往成日發生導盲犬被拒入商場、食店事件，隨着公開宣傳及教育，接受風氣稍有改善之際，依然有餐廳唔喜歡導盲犬。讀者王先生話，噚日下晝一點半左右佢到屯門仁政街一間越南餐廳食嘢，約半小時後走出門口時，就見到導盲犬被拒入店。
餐廳致歉 稱會加強培訓
佢話當時有一名視障人士帶住一隻黑色導盲犬企喺門邊，旁邊有位女導師向職員表明，希望餐廳騰空位置畀兩人一狗就坐，點知個女職員見到隻狗就話：「隻狗喺度會嚇親客人！」拒絕要求。女導師無奈講番畀嗰位視障人士聽，個男人聽完神情有啲失落，就話去第二度食，黯然離開。
王先生睇到成件事經過就話覺得好嬲，一來導盲犬係工作犬，無論去商場、食店或交通工具都應該係無任歡迎，唔明白點解會有食店職員拒絕要求，直斥對盲人唔公平，佢認為或者同公眾認知不足有關，政府應該加大力度宣傳先有效果。
我哋致電問返嗰間餐廳，一名女經理回應指公司表明接受導盲犬進入食店，可能接待嗰位女同事唔知，搞到有誤會，佢話要向嗰位視障人士講唔好意思，亦會加強員工培訓。