車cam可以錄低行車意外保障受害司機，家居天眼亦是防盜好幫手。旺角一個唐樓單位大門外閉路電視，前日拍攝到2個男人企圖撬門爆竊過程，更清楚影到2疑犯嗰樣，女業主立即報警，並上載有關片段同相片，提醒巿民小心防範，事件引起網民熱議，有指賊人沙膽：「明知有cam影住都仲要撬門，口罩都唔戴！」
涉事單位業主陳小姐同我哋講，佢位於通菜街與山東街交界嘅唐樓四樓單位，前日下晝4點幾，租客打電話畀佢話大門被人刮花，而隔籬一劏多房單位嘅大門更加被撬到爆開晒，陳小姐立刻趕去視察，同埋打999報警。
不排除自由行犯案
佢話翻睇安裝喺門口嘅CCTV，發現嗰日下晝3時06分有一個着白衫可疑人經過，疑充當哨兵踩線，約20分鐘後另一名着深淺間條Polo恤男人經過單位前，鬼鬼祟祟周圍望咗一陣，發現有CCTV監控後，竟然唔係走佬，而係將CCTV拉低，影響拍攝角度，影唔到其他單位，呢個時候隔籬單位大門就俾人用鐵筆撬開，由於單位內每間劏房都裝咗閘，賊人可能覺得撬閘聲會驚動住客所以放棄，將目標轉移番陳家單位。
當時個賊人戴住手襪，攞出鐵筆撬咗道門幾下，發現唔係想像中容易，嘗試幾次失敗後就走咗，由同黨踩線開始，成個過程大約半個鐘，好彩最後兩個單位都無財物損失。
陳仲話隔籬單位業主咁啱去咗台灣，爛門要等業主返嚟先搵人重新裝番，租客呢幾日都要特別小心。
陳小姐又引述差人話，據兩個疑人打扮同衣着，唔排除係自由行來港作案嘅竊賊，陳小姐又話上址唐樓屬三無保安（無大閘、無保安、無CCTV），容易俾人潛入，所以會加裝番鐵閘以防萬一。
警方回應話前日下晝4時38分接獲報案，指旺角通菜37至39號一幢大廈兩個單位遭人企圖爆竊，均無財物損失，經調查後暫列刑事漽壞案，正通緝兩名年約30至40歲嘅中國籍男子。
