英冠球會阿士東維拉陷入財政危機，上月未能如期向英國當局繳交400萬鎊稅款，主席夏建統更出現資金周轉困難，好彩球隊上周五宣佈，已獲埃及富商蘇利斯同埋美國商人伊頓擁有嘅財團注資，而夏建統將會繼續留任主席一職，佢哋除咗會替維拉解決財政問題外，仲有意搵法國前國腳亨利執教球隊。
維拉嘅官方聲明提到，由身家至少有5.3億鎊嘅蘇利斯同美國NBA公鹿班主伊頓共同擁有嘅財團NSWE，會即時向球會注入一筆可觀資金，而注資仍有待英冠賽會批准。《彭博》引述知情人士報道，NSWE將購入維拉55%股份，作價約為3,000萬鎊（約3.1億港元）。
亨利啱啱辭去喺《天空體育》嘅評述一職，想專心教波嘅意向表露無遺。佢係比利時教練馬天尼斯嘅重要助手，並成功助比利時喺啱啱結束嘅世界盃拎到隊史最佳成績嘅季軍，呢名兵工廠名宿絕對有可能離開，去英冠尋求新挑戰。
基沙文舉盃衣錦還鄉
講開亨利，法國教練迪甘斯就認為，綽號「新亨利」嘅基利安麥巴比已經成長，目前嘅水平甚至比昔日同齡時嘅亨利同查斯古特更加出色。對於喺世盃中入四球嘅麥巴比，迪甘斯畀咗高度嘅評價：「佢識好多其他人唔識嘅嘢，佢好聰明，而且會聆聽意見。佢表現無論好壞，我都會同佢講，佢都會聆聽意見同改正，喺1998年無論係亨利定查斯古特，都做唔到佢現時嘅角色。」亨利同查斯古特喺1998年，即係迪甘斯以隊長身份帶領法國贏世界冠軍嘅時候，都係決賽周23人大軍嘅成員，不過兩個上陣機會寥寥可數，喺兩年後法國贏得歐洲國家盃時，先喺國家隊奠定自己嘅地位。
法國一眾世盃奪冠功臣就有各自唔同嘅慶祝節目，喺賽事交出四入球兩助攻嘅基沙文就帶咗世盃獎盃返到家鄉梅肯，呢次衣錦還鄉獲得鄉親父老嘅熱烈歡迎。有多達2,000名球迷迎接呢名馬德里體育會球星，民眾都載歌載舞，有啲人仲揮動國旗，場面熱鬧。